தாடாசனம்

முதலில் நேராக நின்று பார்வையை நேர்கோட்டில் வைத்து பார்க்குமாறு இருக்கவேண்டும்.. கைகளானது பக்கவாட்டில் உடலோடு ஒட்டி இருக்கவும்.  இரு கால்களும் உடல் எடையைச் சமமாகத் தாங்கியிருக்க வேண்டும். முழங்கால் சிப்பு மேலே நோக்கித் தூக்கிய நிலையில் இருக்க வேண்டும்.  தொடைகளும் பின்புறத் தசைகள் இறுகிய நிலையில் இருக்க வேண்டும். மூச்சை உள்ளுக்கு இழுத்தபடி கைகளை மேலே தூக்குங்கள்.

மேலே செல்லும் கைகள் நேராகவும் விண்ணென்றும் இருக்க வேண்டும். கால்களின் நிலையை மாற்றக் கூடாது. தோள்களுக்கு நேரே கைகள்  வந்ததும் முழங்கைகளை மடக்கிக் கைகளைக் கூப்பவும். கூப்பிய கைகளின் அடிப்புறம் நேராக, பூமிக்கு நோக்கி இருக்க வேண்டும். மூச்சை மெதுவாக  வெளியே எடுத்து விடவும்.

மூச்சை மெல்ல இழுத்தபடி மெதுவாகக் கையைத் தலைக்கு மேல் உயர்த்துங்கள். உள்ளங்கைகள் ஒன்றோடு ஒன்று ஒட்டியபடி இருக்க வேண்டும்.  கைகளை முடிந்தவரை மேல் நோக்கி இழுத்தபடி குதிகால்களை மேலே தூக்கவும். தலையை மேல் நோக்கியபடி உயர்த்தவேண்டும். தாடாசனம்  செய்து முடித்ததும் குதிகாலைக் கீழே இறக்குங்கள்.

மூச்சை மெதுவாக வெளியேற்றியபடி கைகளைத் தளர்த்துங்கள். கைகளைக் கீழே தொங்கப் போடலாம் அல்லது கூப்பிய நிலையில் மார்பை ஒட்டி  வைக்கலாம். மீண்டும் மூச்சை உள்ளே இழுத்தபடி கைகளையும் குதிகாலையும் தூக்கவும். பிறகு பழைய நிலைக்கு வரவும். இதை நான்கைந்து  முறைச் செய்யலாம். விரல்களைக் கோத்தபடியும் கைகளை மேலே தூக்கலாம்.

பலன்கள்

நின்ற நிலையில் செய்யும் ஆசனங்களுக்கெல்லாம் இது அடிப்படையானது. இது உங்கள் உடலின் தோற்றத்தை மேம்படுத்துகிறது. நிமிர்ந்த  தோற்றத்தைப் பெற உதவுகிறது. உடலின் ஸ்திரத்தன்மையைக் கூட்ட உதவும். பதற்றம் தணிந்து மனஅமைதி பெற உதவும். உடலின் எல்லாத்  தசைகளும் புத்துணர்ச்சி பெறும். தொடர்ந்து செய்துவந்தால் முதுகு வலி குறையும்.

தட்டையான பாதம் கொண்டவர்களுக்கு ஏற்படும் தொல்லைகள் குறையும். கணுக்கால்கள், தொடைகள், அடி வயிறு, முதுகு வலுப்பெறும். நின்று  செய்யும் ஆசனங்களைச் செய்ய இந்த ஆசனப் பயிற்சி உதவும்.

எச்சரிக்கை

தோள்பட்டையில் காயமோ, நாள்பட்ட வலியோ இருந்தால் இதைச் செய்வதைத் தவிர்க்கவும். தலைவலி, தலைசுற்றல், தூக்கமின்மை, குறைந்த ரத்த  அழுத்தம் முதலிய உடல் உபாதைகள் இருப்பவர்கள் இதைச் செய்வதைத் தவிர்க்கவும்.

-அஷ்ரப்